Differentas famiglias da Brusio e conturns tramettan lur uffants empè da la canorta a Poschiavo, al Nido a Tirano.
Custs decisivs per tgira d’uffants
Las tariffas da las canortas en Svizra vegnan stimadas tenor gudogn. En l’Italia è quai per famiglias «estras» er uschia. Dentant èn las tariffas cumparegliadas cun quellas en Svizra var tschintg giadas pli bassas.
La spierta a Tirano è gronda
A Tirano datti duas differentas sorts dad «Asili». In è dal stadi ed è public, l’auter è ina canorta-scolina privata – «il Giardino d’infanzia». Quel metta pais sin in’educaziun religiusa, siond in’organisaziun che vegn menada da mungias. Ils bun 200 uffants che vegnan tgirads durant tschintg dis l’emna, han tranter 0 e 6 onns.
Differents stils
Entant che las instituziuns talianas mettan surtut pais sin l’educaziun religiusa e linguas (a partir da trais onns vegn cumenzà cun l’instrucziun d’englais), è il contact cun la natira, projects da Montessori ed il svilup natiral da l’uffant la finamira da la canorta a Poschiavo.
Problem per la Valposchiavo
Il fatg che differentas famiglias tramettan lur uffants en Italia a Tirano al Nido, è per la canorta a Poschiavo in problem.
L’organisaziun ed il sforz sajan stads gronds per realisar ina canorta en la val Puschlav, ha declerà Danila Bontadelli, da l’associaziun famigliara, Valposchiavo . Entant avessi er anc plaz per dapli uffants e la purschida pudess tenor dumonda er vegnir engrondida.
RR actualitad 12:00