Siglir tar il cuntegn

Header

video
Students da design sin visita en Val Müstair
Or da Telesguard dals 07.02.2017.
laschar ir. Durada: 4 minutas 8 Secundas.
cuntegn

Engiadina La Val Müstair sveglia creativitad

La scola spezialisada superiura ibW ha organisà per l’emprima giada in’emna da project speziala per ses students da design da product. Lur incumbensa: Inventar e crear products per tschintg differentas interpresas e persvader cun ideas innovativas.

Il squitsch da temp era aut, la finamira ambiziusa: 21 students han gì durant in’emna l’incumbensa da crear en pliras gruppas tschintg differents products per tschintg differentas interpresas. Ils students han lavurà da la damaun fin la saira vi da la sfida dad inventar products innovativs, che pudessan plaschair a differentas interpresas.

Inventar e crear per il mund real

La finamira da l’emna da project è stada da lavurar cun interpresas realas e crear products, che van en il meglier cas schizunt en producziun. A disposiziun per las lavurs èn stads differents materials sco crap, vaider, metal e schizunt ina maschina per tagliar ils materials cun pressiun dad aua.

Dal guaud da parasols a la selfie-box

La fin da l’emna han ils students exponì lur projects finids. Tranter da quels eran per exempel in guaud da parasols, ina curuna da vaider u ina box da far selfies cun ina camera integrada da 360°.

Ideas da design èn venalas per 5’000 francs

Sche las ideas dals students persvadan las interpresas, pon las interpresas cumprar ils dretgs da design per mintgamai 5’000 francs. Quella decisiun prendan las interpresas dentant pir en il decurs da las proximas emnas.

Artitgels legids il pli savens