Las uniuns Gastro e Mansteranza da la Val Müstair crititgeschan la destinaziun Engiadina Scuol Samignun Val Müstair. Il president da Gastro Val Müstair - Pierre-René Grond - ha ditg a Radiotelevisiun Svizra Rumantscha che la destinaziun na fetschia betg in marketing adattà ord optica da la Val Müstair. La destinaziun na cuntanschia betg quels turists che fissan il public per la Val Müstair.
Pli concret n'ha il president da la Gastro Val Müstair betg vulì denominar la critica. Quai pervia ch'i dat ina sesida culla destinaziun l'emna che vegn per discutar las renfatschas. Avant quella sesida n'ha il president betg vulì dir dapli envers las medias.
Critica enconuschenta
La destinaziun Engiadina Scuol Samignun Val Müstair enconuscha la critica che vegn nà da la Val Müstair. Gia avant stgars 2 onns avevi dà critica envers la destinaziun. Lura aveva la populaziun dentant decidì quasi unanimamain da restar tar la destinaziun. Urs Wohler, il directur dad Engiadina Scuol Samignun Val Müstair appelescha da lavurar ensemen empè da dispitar. Quai saja fitg impurtant, gist ussa en temps difficils per il turissem en Grischun.