La tschorvadad è la malsogna la pli derasada tar la selvaschina d’ungla. Mintg’onn registresch'ins radund 300 animals pertutgads. 30% dals animals pertutgads vegnan cumplettamain tschorvs. Surdada vegn la malsogna d'animal ad animal en furma da contact direct, tras particlas en il vent ed era tras mustgas.
En Grischun èn adina puspè pertutgà il chamutsch ed era il capricorn da la tschorvadad. Dapi l’onn passà pon ins observar la tschorvadad da chamutschs e capricorns en Engiadina’Ota e quest onn era en l’Engiadina Bassa e la Val Müstair.
Actualmain n'è la situaziun betg anc gravanta. En differents lieus han ins observà singuls cas. Ils guardiaselvaschina observan e tiran las mesiras necessarias.
Sch’in viandant u chatschadur observa in chamutsch cun la tschorvadad, èsi fitg impurtant da betg disturbar l'animal e da clamar pli spert pussaivel il guardiaselvaschina.
Sajettar sco davosa varianta
Il guardiaselvaschina sto avair in egl spezial per eruir, sch’in chamutsch è propi periclità. Be sco ultima mesira vegnia il chamutsch schluppettà.
audio
Bunura: Tschorvadad da chamutschs sa derasa en Engiadina