Siglir tar il cuntegn
cuntegn

Engiadina La Punt beneventa etappa roiala dal Tour de Suisse

Gia la 8avla giada sa ferma l'entira caravana da la cursa da velos en l'Engiadina. In eveniment da talmain gronda muntada è daventà ina tradiziun per la vischnanca da La Punt Chamues-ch. Grazia a la cuntinuitad dapi il 1992 è la lavur preparativa daventada er pli simpla.

Legenda: Guardar il video L'etappa roiala dal Tour de Suisse cun arriv a La Punt. Durada 03:16 minutas.
Or da Telesguard dals 15.06.2017.

Che La Punt Chamues-ch po beneventar puspè cun l’etappa roiala la pli pretensiusa etappa da la cursa è per il comité d’organisaziun da gronda muntada. Cun quai che la vischnanca ha organisà pli u main mintga quatter onns in arriv d’etapp, saja la lavur daventada pli simpla, per part gia rutina, ha declerà Ralf Fluor, il schef per l’infrastructura, traffic e segirezza a La Punt.

Dapli segirezza ch'anc avant onns

Midà en congual cun l’emprima ediziun d’in arriv d’etappa dal Tour de Suiss a La Punt l’onn 1992 saja surtut l’aspect da segirzza. Il dispositiv da persunas che surveglian e controllan l’areal saja marcantamain pli grond. Quai prescriva er il chantun tar eveniments da tala grondezza, ha agiuntà Ralf Fluor. El è responsabel per totalmain 55 persunas ch’èn en acziun durant quests dis.

En munaida è in arriv dal Tour de Suisse betg da valitar, dentant signifitga l’eveniment per La Punt ina reclama nunpajabla.
Autur: Ralph Bösesecretariat e medias La Punt

Tut ils sforzs e las installaziuns che la vischnanca fa per organisar in eveniment perfect valia segir la paina èn persvas tut ils involvids. La Punt Chamues-ch fa quint cun 2’500 fin 3’000 aspectaturs a la cursa cun bun 170 curridurs.

Il budget da 120’000 francs vegn d'ina vart purtà da sponsurs, da l’autra erda la vischnanca, il turissem e dal Club 92 ch'aveva inizià a La Punt sco lieu d’etappa. Già la segunda giada surpiglia la vischnanca da Zernez la partenza da la proxima etappa dal Tour de Suisse suenter l'arriv a La Punt Chamues-ch.

Program da divertiment

Dasper l’arrivada dals curriders dal Tour de Suisse a La Punt sco tal porscha la vischnanca ia a partir da las 14:30 in program per ils visitaders. Suenter la cursa envida La Punt ad ina festa cun musica e saut en la tenda cun la «Chapella Blazenka».

Cun passar sur il pass da l’Alvra, ina part dal Patrimoni cultural mundial da l’Unesco, daventa la 6avla etappa da la cursa da Locarno - sur bun 166 km - fin a La Punt Chamues-ch in dals puncts culminants dal Tour de Suisse 2017.

RR actualitad 17:00++