Siglir tar il cuntegn
cuntegn

Engiadina La «Posta Ladina» na vegn en l'avegnir betg stampada en Engiadina

Dapi 25 onns stampa la firma Gammeter Druck und Verlag AG la gasetta tradiziunala Posta Ladina. A partir dal prim da schaner 2018 vegn quella stampa dischlocada.

Legenda: Guardar il video La maschina da stampa da Gammeter. Durada 00:16 minutas.
Or da RTR dals 24.05.2017.

Trais motivs èn stads decisivs per la decisiun da la firma Gammeter da dischlocar la stampa da la Posta Ladina. Els prevesan da tschertgar ina collavuraziun cun in dals gronds centers da stampa en Svizra.

Ils motivs per la dischlocaziun

Emprim motiv: La maschina da stampar gasettas è vegnida en ils onns, chattar tocs da reserva per quella è vegni adina pli grev.

Segund motiv: La tecnologia da stampa è sa midada fitg ferm ils ultims onns. La maschina da stampar gasettas na correspunda betg pli al standard d’ozendi.

Terz motiv: Ina maschina da stampar gasettas chaschuna blera canera. Quai disturba ils proprietaris en condomini cun la firma Gammeter Druck und Verlag AG.

Per la redacziun da la Posta Ladina maina quest midament era in avantatg. Fin ussa stevan els esser pronts a mezdi cun la part redacziunala per stampar suentermezdi. En l'avegnir basta era sch’els èn pronts pir la saira, uschia ch'els san era resguardar las ultimas novitads dal di.

Il prim da schaner 2018 vegn dimena la gasetta stampada extern. La decisiun nua ch’ella vegn squitschada segua la fin da la stad. La firma Gammeter n'è betg mo ina stamparia da gasettas. Lur gronda lavur è il stampar prospects, cartas da visita, flyers, rapports da gestiun e bler auter dapli. Quella part vulan els schlargiar cun realisar in’ulteriura sala da stampar en vischinanza da la firma existenta.

RR actualitad 12:00