Engiadina - La cursa da passlung «la Diagonela» ha lieu
Er quest onn han ils organisaturs da «la Diagonela» en l’Engiadina da cumbatter cun la mancanza da naiv. La preparaziun da las loipas n’era betg optimala. Tuttina ha l’occurrenza da passlung en stil classic er lieu quest onn, scrivan ils organisaturs.
Ils organisaturs èn optimistics che la cursa da passlung en stil classic po vegnir realisada sur la distanza originala da 65 kilometers. Dapi il 2013 datti «La Diagonela» cun partenza ed arrivada a Zuoz. Igl è ina cursa che fa part a la seria internaziunala da passlung «Ski classics».
