Siglir tar il cuntegn

Engiadina L'UDG beneventa la restructuraziun da la Lia Rumantscha

L'Uniun dals Grischs è dal maini ch'i dovra da principi novas structuras. Ella vesa dentant er difficultads cun democratisar la Lia Rumantscha.

Participants da la radunanza generala da l'UDG a Zuoz sesan en rudè e discutan
Legenda: Discussiuns intensivas a la radunanza generala da l'UDG a Zuoz RTR, R. Mayer

En connex cun la radunanza generala da l’Uniun dals Grischs, UDG, è vegnì infurmà davart las restructuraziuns da la Lia Rumantscha che stattan il mument en discussiun. La radunanza generala da l’UDG ha valità en senn positiv questas restructuraziuns.

In gea da principi

Ch’i dovria structuras novas n’è betg vegnì mess en dumonda. Ils problems per democratisar la Lia Rumantscha sajan dentant avant maun. I giaja per dumondas sco per exempel: «Tgi è insumma in Rumantsch?, tgi po eleger president e suprastanza?, datti in parlament? Quant ferm vegnan integrads ils Rumantschs da la Bassa en quest process democratic?» Questas dumondas avertas stoppian anc vegnir discutadas, è stà l’eco da l’Uniun dals Grischs. In emprim pass capita ils 11 da zercladur a Cuira durant l’inscunter da tut las organisaziuns affiliadas a la Lia Rumantscha.