Siglir tar il cuntegn
cuntegn

Engiadina L'hotel Schweizerhof Vulpera serrà per radund 3 onns

La LMEY Investment prevesa ina sanaziun da ses hotel a Vulpera. Il nov concept prevesa in hotel cun abitaziuns, in aparthotel.

Legenda: Guardar il video Reacziuns sin la serrada da L'hotel Schweizerhof Vulpera. Durada 02:36 minutas.
Or da Actualitad video dals 24.03.2016.

Sco quai che la pledadra da medias dal Robinson Club, Natascha Kreye, ha confermà envers RTR, possian ins far reservaziuns en il Schweizerhof sco Club Robinson anc fin ils 3 d’avrigl. Davart dumondas che van sur quest datum ora decida la possessura da l’hotel LMEY, che ha sia sedia en l’Ollanda.

Tenor Marc Sontag, cusseglier administrativ da la LMEY, duai quai dar per l'hotel in nov concept cun in nov gestiunari. Ins haja già signà ina decleraziun d'intenziun cun in nov gestiunari.

Il plan saja da realisar in concept cun abitaziuns, pia in uschenumnà aparthotel. Per realisar il nov concept quinta Sontag cun 2 enfin 3 onns. Durant quel temp resta il Schweizerhof a Vulpera serrà.

Christian Fanzun, president communal da Scuol, ha confermà che l’hotel Schweizerhof resta serrà e duess vegnir renovà aifer ils proxims trais fin quatter onns. Quai saja in lung temp, era per in hotel da las dimensiuns dal Schweizerhof, uschia Fanzun.

Las pendicularas perdan blers raps

Il president dal cussegl d'administraziun da las pendicularas Motta Naluns en Engiadina Bassa, Andri Lansel, è fitg trumpà da la nova ch'il Schweizerhof a Vulpera resta ussa serrà. Las pendicularas hajan fatg ins svieuta da radund 750'000 francs ad onn cun ils giasts dal Robinson Club Schweizerhof. Lansel resta dentant optimist ed è cuntent che la possessura dal Schweizerhof haja plans per l'avegnir e na veglia betg vender la chasa.

Dapli infurmaziuns èsi lura da spetgar en radund in mais, cura ch'ils detagls per il nov project vegnan preschentads. Actualmain èsi be cler ch'il Club Robinson banduna l'Engiadina Bassa.

RR novitads 20:00