Siglir tar il cuntegn
cuntegn

Engiadina L'Engiadinais austriac en Engiadin'Ota

Gerhard Walter è il nov CEO da la destinaziun Engiadina San Murezzan. El deriva da Galtür en Austria ed è uschia in pau Engiadinais. Ed el ha per forza vulì lavurar a San Murezzan.

Gerhard Walter
Legenda: Gerhard Walter, il nov CEO da la destinaziun Engiadina San Murezzan RTR/David Spinnler

El deriva da Galtür, il lieu entasum la Val Paznaun. E Galtür aveva ina stretga relaziun cun l'Engiadina Bassa, cun Ardez. Uschia pudess ins dir che l'Austriac Gerhard Walter è era in zic Engiadinais. Ussa è el il nov directur da turissem en Engiadin'Ota e successur dad Ariane Ehrat.

In lieu da siemi

L'Engiadin'Ota e San Murezzan sajan per el in lieu da siemi sco turisticher di Walter. El che ha lavurà sco directur da turissem en lieus sco Lech-Zürs u Kitzbühel na vesa l'Engiadin'Ota sco lieu nua ch'i fiss pli difficil dad avair succes en la branscha turistica. Per Gerhard Walter èn las ingredienzias per in turissem da success dapertut las medemas. El sappia dentant bain che sia lavur en Engiadina saja ina gronda sfida.

Ussa vul Walter elavurar la nova strategia per la nova organisaziun turistica da l'Engiadin'Ota. Quai ensemen cun la direcziun e cun il cussegl administrativ. Walter vul dentant integrar tut ils players turistics en il process da strategia. E betg mo quai, el vul integrar via medias socialas era per exempel ils giasts. La nova strategia duai esser pronta il november da quest onn.

RR actualitad 17:00