Suenter che l'ultima disco en Engiadina Bassa, la legendara «Gallaria» amez Scuol, era vegnida serrada la fin d'avrigl, n'aveva la giuventetgna pli nagin lieu per s'inscuntrar, ballar e far festa.
Perquai han ils giuvenils cumenzà a sa dustar sin via politica. Ils diesch da matg han els lantschà ina petiziun, che pretenda l'engaschi da la vischnanca per chattar soluziuns a favur da la giuventetgna e la vita da notg.
1'028 suttascripziuns
Il sustegn davart da la populaziun è stà grond. Entaifer trais emnas han ils giuvenils ramassà 1'028 suttascripziuns.
Cun la petiziun fan ils petiziunaris valair trais giavischs:
- La vischnanca duai procurar per la reavertura transitorica da la disco «Sounds» tar l'implant da sport Trü. Quel e cun el er la disco èn en possess da la vischnanca. Il «Sounds» era vegnì serrà avant onns pervi da reclamaziuns ch'el causeschia massa blera canera.
- La vischnanca duai s'engaschar er per ina reavertura da la disco «Gallaria» – e saja quai er be enfin ch'i dat autras soluziuns en la vischnanca.
- La vischnanca duai promover ina nova disco sin il territori da Scuol en sustegnend mintga dumonda da fabrica, che prevesa la realisaziun dad ina discoteca en ina zona prevesida per ina tala gestiun sco per exempel en las zonas da mastergnanza en la vischnanca.
Il capo communal Christian Fanzun ha prendì encunter la petiziun e segirà a la giuventetgna il sustegn davart da la vischnanca per chattar ina soluziun per l'avegnir.
Gia cun lantschar la petiziun il cumenzament da matg avevan ils iniziants annunzià, da vulair far in'iniziativa, sche lur petiziun n'haja betg il success giavischà.
RR novitads 12:00