L'Engiadin'Ota tema la fin dal hotel Stahlbad a San Murezzan

Tge che capita cul hotel Stahlbad / Roi Soleil a San Murezzan n'è betg cler. Quai procura per gnervusitad en Engiadin'Ota.

Laschar ir video «Quitads davart l'avegnir dal hotel Stahlbad / Roi Soleil»

Quitads davart l'avegnir dal hotel Stahlbad / Roi Soleil

2:10 min, Actualitad video dals 6.1.2016

Il club Med vul vender ses hotel ch'el ha ensemen culla societad beltga Intersoc a San Murezzan. Pertge n'è betg cler - l'hotel vala sco in da quels che marscha bain. Cler n'è era betg tgi che savess cumprar l'hotel.

tavla dal hotel dal Club Med

Legenda da maletgs: Il Club Med vul vender ses hotel a San Murezzan. Ils giasts dal Club Med a San Murezzan èn giasts impurtants per l'Engiadin'Ota. RTR/U. Morell

Questa novitad pissera per gnervusitad en Engiadin'Ota. Il president communal da San Murezzan Sigi Asprion di che l'hotel è fitg impurtant per la vischnanca, ma era per las pendicularas. L'hotel gestiunescha passa 100'000 pernottaziuns durant tut l'onn. La vischnanca na possia dentant betg far bler en la situaziun actuala. Ins savess bain porscher maun sch'ins vuless per exempel engrondir l'hotel. Sche ina societad privata less vender l'hotel na possia la vischnanca dentant far nagut.

Pensiers era davart la regiun

Era la regiun n'è betg cuntenta cun la situaziun. Martin Aebli, president da la cumissiun da planisaziun regiunala ha ditg envers Radiotelevisiun Svizra Rumantscha RTR ch'i saja grev da chapir pertge che l'hotel na duai betg pli esser attactiv per ils possessurs. L'hotel che vaglia cun sia occupaziun auta sco model da success. La regiun fiss en mintga cas pronta da gidar cun mesiras per il svilup economic. La regiun na saja dentant betg vegnida contactada enfin ussa.