La societad da commerzi e masteranza da l’Engiadina Bassa ha organisà il davos temp pliras maisas radundas. Quai a Zernez, Scuol ed in Samignun per discutar ils interess da ses commembers. Ils commembers sajan da l’avis che la societad duess nizzegiar pli ferm ils potenzials da la regiun cun sia natira, las auas ed autras particularitads declera Claudio Andry, il president da la societad.
Questiunari mussa ils quitads
Il pli fitg pateschan tenor ils commembers la branscha da l’hotellaria e quella da fabrica. In questiunari repartì a tut las 600 gestiuns mussa che la majoritad da las gestiuns spetgan per l’avegnir in regress economic. Il president da la societad spera che i dettia bainbaud puspè lavur avunda sin il sectur da fabrica. Quai causa che il chantun ha mess en vigur l‘ordinaziun da la lescha da segundas abitaziuns. El spera numnadamain che il chantun haja encletga per la situaziun da las regiuns e da las vischnancas.
Arranschaments per ils commembers
La mitta d’avust ha lieu a Scuol la conferenza da “openaxs”. Questa organisaziun ha la finamira da spordscher en tut la Svizra ina rait da fibra optica. La societad è persvadida da l’avegnir da questa tecnologia. Ils commembers han plinavant surdà a la suprastanza l’incumbensa da prender per mauns l’organisaziun d’ina exposiziun da commerzi e masteranza. Quella vegn ad esser probablamain en primavaira dal 2018. La davosa EBexpo era dal 2013 a Scuol.