Siglir tar il cuntegn
Inhalt

Engiadina «Jau ma sun vivì en bain»

Suenter quatter mais e mez sa sentia Gerhard Walter, il nov CEO da la destinaziun Engiadina San Murezzan, prendì si bain dals Engiadinais. Quai ha el ditg a l'ur da la preschentaziun da la campagna d'enviern als turistichers engiadinais.

Gerhard Walter, in um da 53 onns, sportiv cun chavels grisch-nairs petnads enavos cun pomada, ha en ina chamischa alva ed in tschop nair.
Legenda: Il nov schef da la destinaziun da turissem Engiadina San Murezzan è dapi 4,5 mais en uffizi. RTR, David Spinnler

Gia suenter ils emprims mais en Svizra saja surtut ina chaussa sa verifitgada: ils Svizzers e las Svizras sajan definitivamain ospitants. Che quai na saja betg il cas, sco i vegnia ditg adina puspè en l'exteriur, saja propi mo in pregiudizi, uschia Gerhard Walter.

Ils emprims mais en uffizi ha Gerhard Walter surtut lavurà vi da la nova strategia per la destinaziun. Suenter 10 onns vul l'organisaziun da turissem numnadamain ir sur ils cudeschs. En in process dad «Open Innovation» nua che tut ils interessads sco era ils turistichers pon sa participar, duai la nova strategia vegnir elavurada durant ils proxims mais.

Marca veglia en nov vestgì

La veglia strategia da duas marcas duai era esser la nova strategia, tradescha Gerhard Walter entant. Ina marca da San Murezzan ed ina marca da famiglias Engiadina. Las marcas duain dentant survegnir ina nova furma. Co è dentant anc avert, resultats possian ins spetgar il december. Gia il schaner duai la nova strategia lura ir in vigur.

RR actualitad 07:00