Siglir tar il cuntegn
Inhalt

Engiadina Jamie Cullum, il magnet sisum la muntogna

Il renumnà chantadur e pianist englais è in dils gronds stars mundials dal Festival da jazz San Murezzan 2017. En occasiun dal giubileum da 10 onns han ils organisaturs envidà ad in concert gratuit dal star si Muottas Muragl.

Legende: Video Jamie Cullum si Muottas Muragl abspielen. Laufzeit 03:51 Minuten.
Or da Actualitad video dals 20.07.2017.

Tenor l’intendant dal Festival da jazz San Murezzan, Christian Jott Jenny, han ils visitaders pudì sa legrar sin in concert d’in dils pli gronds entertainers ch’i dettia per il mument insumma sin il mund:

Jamie Cullum ha dus ingredienzas per avair success. El sa trategnair ed è er anc in musicist excellent.
Autur: Christian Jott Jennyintendant Festival da jazz San Murezzan

Ils 2000 aspectaturs ed era Jamie Cullum e sia band han giudì la saira. Cullum ha dà in concert frenetic ed el ha salidà il public en rumantsch.

Per cuntanscher la plazza da concert sin 2'453 meters sur mar, han ins ubain da chaminar si sin la muntogna ubain duvrar il tren da la funivia da Muottas Muragl. Quella è circulada dapi il suentermezdi cuntinuadamain per manar si uschè svelt sco pussaivel ils numerus giasts che han gì da star en colonna. E quai tant per ir en si sco er suenter il concert puspè giu da la muntogna.

Sfida per pendicularas Engiadina San Murezzan

La logistica per organisar in concert cun 2'000-3'000 persunas sin ina muntogna pretenda ina buna preparaziun. Ils collavuraturs da las pendicularas Engiadina San Murezzan han dirigì gia dapi la damaun bel stretg ils autos in sper l’auter sin ils parcadis. Finalmain n'èn quels betg stads gronds avunda uschè che plira visitaders han gì da parcar lur autos pli lunsch davent da la staziun da Muottas Muragl.

Factur aura n'è betg calculabel

Entant ch’ins è bun dad organisar e preparar pli u main tut per in eveniment perfetg, datti in punct sin la glista che n’è betg en ils mauns dals organisaturs – numnadamain l’aura. Petrus para dad esser in amatur da la musica da jazz. Durant il concert s'han las nivlas nairas spustadas davent da la muntogna e la temperatura sin 2'453 meters sur mar è er stada agreabla.

Tenor Christian Jott Jenny n’haja anc mai dat in concert dal Festival da jazz si Muottas Muragl cun simplamain tschiel blau e sulegl.

RR actualitad 12:15