Siglir tar il cuntegn

Engiadina Jäger: «Serrar l'Institut Otalpin è stà necessari»

Che la scola media a Ftan sto serrar las portas saja ina necessitad economica, ha ditg cusseglier guvernativ Martin Jäger. Il svilup demografic dals ultims onns stoppia avair consequenzas tar las scolas medias privatas. Adina damain uffants muntia adina damain scolars.

Martin Jäger.
Legenda: Teor Martin Jäger è la serrada da l'institut stada necessaria. Keystone

Cura ch'il schef dal departament d'educaziun e sport grischun Martin Jäger discurra da las scolas medias differenziescha el cleramain tranter scolas privatas e la scola chantunala. Ils problems actuals èn tar las scolas medias privatas, u almain tar intginas sco l'exempel da l'Institut Otalpin a Ftan ha demussà. Questa serrada saja forsa er in indizi persuenter ch'i ha memia bleras scolas medias en il Grischun. Per ils scolars da l’institut haja quai detg avunda plaz en las autras scolas medias en la regiun.

Fissan quellas scolas medias scolas chantunalas, avess il chantun daditg agì!
Autur: Martin Jägercusseglier guvernativ

Far insatge en chaussa da las scolas medias privatas en miserias, na po la vart uffiziala cun la regenza grischuna ed il departament da Martin Jäger betg. In pitschen moviment per midar quai aveva quai dentant dà: Durant la sessiun d'october 2012 dal Cussegl grond aveva la deputada Silvia Casutt-Derungs inoltrà in incumbensa che vuleva che la regenza elavuria ina strategia per ina purschida decentrala da scolas medias e professiunalas en il Grischun. Quella è dentant vegnida retratga malgrà che la regenza beneventà ella.

Il problem principal per las scolas medias è dentant il svilup demografic. I dat adina damain giuvenils ed uschia era scolars en il Grischun. Da preschent datti en il Grischun da quai da 2000 giuvenils da 16 onns e mo 1500 da 14 onns. Quai che munta ina reducziun da 25% aifer mo 2 onns. E quai vala per gronda part era per il dumber da scolars en las scolas medias.

I na po betg esser che las classas vegnan adina pli pitschnas en tuttas scolas. Quai na renda betg pli.
Autur: Martin Jägercusseglier guvernativ

Ch'il svilup da las scolas medias cuntinueschia cun serrar ulteriuras scolas na vul Martin Jäger betg crair. El è da l'avis ch’i dettia en il Grischun dapli plaz che mo per 3 scolas medias (ina en l'Engiadina, ina en il Grischun Central, ina en Surselva). Ed insumma è il chantun obligà da s'engaschar per scolas medias decentralas.