Siglir tar il cuntegn

Header

Navigaziun

Legenda: Tadlar il audio Mezdi: Iris Riatsch - la victura da «Landfrauenküche». Durada 12:11 minutas.
12:11 min, Actualitad dals 09.11.2015.
cuntegn

Engiadina Iris Riatsch – la victura da la «Landfrauenküche»

Iris Riatsch da Vnà ha gudagnà la sonda saira il final da l’emissiun «Landfrauenküche» dad SRF1.

Il titel «Miss Landfrauenküche» na plascha betg propi ad Iris Riatsch. Cler, ella haja grond plaschair dal resun che las ulteriuras participantas hajan dà sin ses menu, ma il titel na saja betg uschè impurtant.

Jau na sun nagina miss.
Autur: Iris Riatsch

Iris Riatsch è oriunda da Turitg ed ha emprais a cuschinar las tratgas engiadinaisas cura ch’ella è vegnida a star avant 42 onns a Vnà.

Ses um Domenic Riatsch gidia savens en cuschina – surtut dapi ch’el saja pensiunà, ha Iris Riatsch raquintà al Radio Rumantsch. Ina gronda part da las tratgas retira ella ord ses agen iert a Vnà sin 1'600 meters sur mar.

En l’Engiadina na datti nagin Migros.
Autur: Iris Riatsch

Sco victura da l’emissiun «Landfrauenküche» ha Iris Riatsch gudagnà in bon per far cumissiun dal Migros en la valita da 6’000 francs. Ma tge far cun quel, damai ch’i na dat nagin Migros en l’Engiadina? «Quai n’haja insumma anc betg ponderà», di Iris Riatsch.

Actualmain haja ella blers termins e blers telefons – era da glieud ch’ella n’haja schon daditg betg udì pli insatge. Perquai datti tar ils Riatschs oz era «be» ina salata gentar.

Il menu da la victura

En l’emissiun ha Iris Riatsch simplamain vulì mussar al public las tratgas tradiziunalas da l’Engiadina. Ella avess plaschair, sch’era autras mammas e tattas avessan forsa era plaschair da cuschinar questas tratgas.