Institut Otalpin Ftan sto anc spetgar sin ina nov'orientaziun

Ils 26 d’october ha il suveran da Scuol da decider davart in emprest da 3 milliuns francs a favur da l’Institut Otalpin a Ftan, dentant senza ch'ina clera strategia è vegnida preschentada a la radunanza extraordinaria da sonda passada.

Sin la dumonda suenter ina nova strategia da la scola n'ha nagin vulì prender posiziun.

Dentant ha il nov president dal cussegl d’administraziun da l’Institut Otalpin, Jon Peer, ditg ad RTR che il principal saja quai ussa da chattar novas scolaras e novs scolars.

Radunanza extraordinaria

La radunanza extraordinaria dals acziunaris da l'Institut Otalpin a Ftan ha elegì ses nov cussegl administrativ.

La gruppa da stategia aveva proponì Beatrice Tschanz, Jon Peer, Christian Fanzun, Paul Häring e Sven A. Kohler. Els èn tuts vegnids elegids. Las pli bleras vuschs ha fatg Beatrice Tschanz avant Christian Fanzun, las paucas vuschs ha survegnì Jon Peer.

Era Pro HIF en il cussegl administrativ

Durant la radunanza ha proponì la nova uniun che sustegna l'Institut Otalpin, la Pro HIF, in agen candidat sco sisavel commember per il cussegl administrativ. La radunanza dals acziunaris è seguida a questa proposta ed ha elegì Duosch Fadri Felix en il cussegl administrativ.

Jon Peer nov president

Il cussegl administrativ nov ha lura sa constituì sez ed ha elegì Jon Peer sco nov president dal cussegl administrativ.

Enfin tar la radunanza generala ordinaria ils 5 da december vul il cussegl administrativ nov lura preschentar emprims pass en direcziun dad ina strategia nova per la scola media da Ftan.

Nov rectur ad interim

Stefan Prebil

Legenda da maletgs: Stefan Prebil, il nov CEO ad interim dal Institut Otalpin Ftan Stefan Prebil è il nov CEO ad interim dal Institut Otalpin Ftan. RTR/D. Spinnler

A chaschun da la radunanza d'acziunaris extraordinaria è era vegnì preschentà il nov rectur ad interim. I sa tracta da Stefan Prebil. Prebil ha lavurà durant onns en posts da management da concerns da farma. Prebil ha 52 onns ed ha lavurà actualmain sco cussegliader e coach independent. Prebil cumenza sia lavur a Ftan ils 23 da settember.

RR Novitads 20:00