Cusseglier guvernativ Martin Jäger fa attent sin la problematica da las scolas medias en il Grischun. «Nus avain memia bleras scolas medias en il chantun, tuttas han memia paucs scolars e tuttas fan pli u main il medem», di il schef dal departament d'educaziun dal Grischun. «Sch’i grategia a Ftan da sviluppar in model da scola alternativ, in nov concept per l’institut, lura pudessi dar ina schanza.»
Jau sper che l'emprova ha grond success.
Prender serius la surpraisa
E gist quella schanza vesa era il rectur da l’Institut Otalpin, Sven A. Kohler. El appellescha perquai a la collavuraziun tranter las scolas medias: «Jau sper ch’ins prenda ussa serius quella surpraisa e ch’ins lavura er ensemen en chaussas da dumondas da furmaziun.» Sch’ins na dumognia betg quai, alura vegnia ina restructuraziun da l’Institut fitg greva.
Tuts ston trair vid la medema suga
Persvadì che quai gartegia dentant è Guido Parolini, il president da la Pro Engiadina Bassa, PEB. El è optimistics: «Sche la veglia è qua, forsa era la fantasia, e sch’ins è en ina situaziun ch’il pievel fa squitsch e tuts tiran vid la medema suga, lura èsi pussibel.»
L'engaschament d’ina gruppa d’interess
Mo in’emna suenter l’annunzia che la scola media en l’Engiadina Bassa serria sias portas, è la situaziun sa midada. Grazia a l'engaschament d’ina gruppa d’interess cun geniturs ed autras organisaziuns èsi reussì da rimnar radund 1 milliun francs.
La Pro Engiadina Bassa ha pudì preschentar ina schliaziun a la conferenza da medias dad oz mesemna:
La schliaziun: Scuol cumpra l'institut Otalpin
| La vischnanca da Scuol pudess cumprar ils bajetgs da l'institut ed uschia garantir il manaschi da l'institut. Ensemen cun ils daners rimnads avess l'institut lura ils meds finanzials per surmuntar il temp fin la votaziun che ha probablamain lieu l'october. Tenor ina communicaziun a las medias vegnian ins immediat ad elavurar novas strategias per il futur da l'institut. Latiers s'audian concepts per novs models da scola, l'evaluaziun d'eventualas cooperaziuns educativas cun la regiun ed il diever extrascolar dals bajetgs. |
2 premissas èn necessarias
| 1. premissa | La cumpra da l'institut sto vegnir approvada dal suveran da Scuol. La vischnanca da Scuol vegn a preschentar in'offerta al cussegl d'administraziun da l'institut. La votaziun en chaussa ha probablamain lieu l'october 2015. |
| 2. premissa | I dovra almain 50 scolaras e scolars. Quai per pudair garantir la qualitad pedagogica. Il cussegl d'administraziun spetga las annunzias definitivas fin ils 05. d'avust 2015. Sch'il dumber necessari vegn cuntanschì, lura po la scola puspè avrir sias portas l'avust. |
