Siglir tar il cuntegn
cuntegn

Engiadina Installaziuns temporaras sin la plazz'aviatica da Samedan

Las installaziuns duain garantir dapli frequenzas aviaticas durant las duas emnas dal campiunadi mundial il favrer a San Murezzan. Tenor il mainagestiun da l’Infra per la plazza aviatica regiunala, Daniel Peter, vegnan questas installaziuns ad esser temporaras.

plazza aviatica
Legenda: I dovra tranter auter ina plazza nua ch'ils avius pon parcar per pi lung temp. MAD

Uschè in’infurmaziun durant la seduta dal cussegl cirquital da l’Engiadin’Ota. Sin dumonda da RTR ha Daniel Peter ditg che las dumondas da permiss per las installaziuns duain ir en las proximas duas emnas a Berna tar l’Uffizi d’aviatica civila, curt BAZL. Resposta da quest spetg'ins l’atun.

I sa tracta da 3 installaziun temporaras

Questas installaziuns fissan:

  • ina plazza nua ch’ils aviuns pon parcar
  • In hangar provisoric per il militar
  • in container per il dazi

Plan da master plazza aviatica regiunala

Quai che pertutga il plan da master per la plazza aviatica, duai l'onn 2016 esser l'onn decisiv, uschia Daniel Peter. Igl è enconuschent che la plazza aviatica a Samedan ha da basegn da diversas investiziuns.

I dovra in sistem da segirezza enturn la plazza, novas infrastructuras, ils helicopters ston vegnir separads dals aviuns. En tut muntan las investiziuns a 26 milliuns francs. Sco proxim duain vegnir fatgs studis per 3 fin 4 projects cun segirtad dals custs. Quai duai succeder aifer ils proxims mais.

Anc bler temp fin ch’insatge vegn realisà

Fin ch'ins saja uschè enavant da pudair realisar insatge, vegni tenor Daniel Peter anc ad ir in pèr onns. Il plan da master è enconuschent dapi l'onn 2015.