Siglir tar il cuntegn

Header

video
Referendum cunter ressort «La Sassa»
Or da Telesguard dals 28.11.2016.
laschar ir. Durada: 2 minutas 45 Secundas.
cuntegn

Engiadina Inoltrà referendum encunter ressort da vacanzas «La Sassa»

A Müstair è vegnì inoltrà in referendum che pretenda ina nova votaziun per las decisiuns da la radunanza communala dals 2 da november 2016. Là era vegnì approvà cleramain ina vendita da terren per in nov ressort da vacanzas e credits da 4,4 milliuns francs per il territori da skis Minschuns.

Il project «La Sassa» dal biro d'architectura Domenig SA.
Legenda: Il project «La Sassa» dal biro d'architectura Domenig SA. mad

Schebain che la radunanza communala da la Val Müstair aveva ditg cun gronda maioritad gea a la vendita da terren per in nov ressort da vacanzas a l'interpresa Domenig Immobilien SA ed a credits da 4,4 milliuns francs, tranter auter per ina nova pendiculara e novs indrizs per ennavar il territori da skis Minschuns, vul in referendum ussa che davart quests affars duai anc ina giada vegnir decis.

Dentant betg pli en radunanza, mabain cun ina votaziun a l’urna.

Votantas e votants na sajan betg vegnids infurmads suffizientamain

audio
Saira: Val Müstair referendum cunter ressort «La Sassa»
ord Actualitad dals 28.11.2016.
laschar ir. Durada: 2 minutas 54 Secundas.

Quai è ina da las rinfatschas principalas ch’il comité da referendum, che consista or da trais persunas privatas numnadamain Pio Pitsch, Hans-Peter Schreich e Jachen Andri Planta fa envers la suprastanza communala. Per in project cun ina tala dimensiun finanziala stoppian las votantas ed ils votants da la vischnanca da Val Müstair avair la pussaivladad da decider a l’urna, uschia ils iniziants. Enavant duai ina missiva stgaffir dapli transparenza en chaussa. Be uschia possia vegnir infurmà suffizientamain e da maniera professiunala davart las schanzas, ma surtut era ils limits ed ils ristgs d’in tal engaschament finanzial da la vischnanca.

Per in referendum dovra quai tenor constituziun communala 50 suttascripziuns. Vegnidas inoltradas èn en tut radund 120 suttascripziuns. Schebain il referendum saja valaivel u betg, na pudeva la vischnanca Val Müstair anc betg dir. I saja anc memia baud per prender posiziun en chaussa, uschia il chanzlist Not Manatschal. Sco emprim vul la vischnanca controllar tut las suttascripziuns sin lur valaivladad. Alura sch'il referendum è valaivel, suonda la votaziun a l’urna.

RR actualitad 17:00

Artitgels legids il pli savens