Siglir tar il cuntegn
Inhalt

Engiadina Inoltrà project per duas chasas da tgira tar il chantun

Tant ils plans per ina nova chasa da tgira Du Lac a San Murezzan, sco er il project per renovar ed engrondir la chasa existenta Promulins a Samedan, èn in grond pass vinavant. Omadus dossiers en l’emprima fasa da project, èn vegnids surdads a l'Uffzi da sanadad.

politichers d'Engiadin'Ota.
Legenda: La surdada dals dossiers engiadinais a Rudolf Leuthold è fatga. RTR, Anna Caprez

Durant ina sairada d’infurmaziun publica a Puntraschigna davart las furmas futuras da l’ospital, il traffic public, la plazza aviatica e la chasa da tgira Promulins, han ils presidents communals da l’Engiadin’Ota surdà al manader da l’uffizi da sanadad, Rudolf Leuthold, ils dus dossiers.

Coordinaziun dals projects

Sco ch’il manader da la conferenza da presidents, Sigi Asprion, ha declerà als radund 150 preschents a Puntraschigna, hajan ins coordinà ils dus projects Du Lac a San Murezzan e Promulins a Samedan avant che inoltrar els tar il chantun.

1,519 milliuns per Promulins

Per realisar las duas chasas da tgira en Engiadin’Ota, han ins er da reparter l’immobiglia existenta a Samedan ch'è anc en il possess da tut las 11 vischnancas. Suenter tractativas pli diras, sajan ins vegnì d’accord da fixar la valur da l’immobiglia Promulins a Samedan sin 1,519 milliuns francs. Las vischnancas da la part sut da l’Engiadin’Ota (Puntraschigna fin S-chanf) han da cumprar las aczias da la societad per in pretsch moderà, ha suttastritgà Sigi Asprion. Per 1 meter quadrat survegnan las vischnancas da la part sura (Segl, Silvaplauna e San Murezzan) radund 200 francs.

2022

Las chasas da tgira Du Lac e Promulins vegnan ad esser en il possess da las duas partiziuns da vischnancas. Tuttas duas vegnian dentant gestiunadas tras l’Ospital regiunal a Samedan. Il project Promulins duai vegnir anc quest onn avant il suveran da las vischnancas involvidas. La finamira è ch’i dat fin l’onn 2022 dus novas chasas da tgira cun mintgamai 60 letgs.

RR actualitads 12:00