Siglir tar il cuntegn

Header

Navigaziun

Visualisaziun.
Legenda: InnHub cun cafeteria. MAD, Foster + Partner
cuntegn

Engiadina InnHub – dretg da construcziun è concedì

La radunanza communala da La Punt Chamues-ch ha ditg Gea al dretg da construcziun per il center da lavur InnHub. Il project da 40 milliuns francs prevesa da realisar in uschenumnà center da co-working per indigens e giasts. Cun ina maioritad dad 88% è la decisiun stada clera.

I sa tracta da duas parcellas cun ina surfatscha totala da 2’666 meters quadrats. La societad InnHub La Punt, sut la direcziun da «mia Engiadina», pajass a la vischnanca da La Punt Chamues-ch per il dretg da construcziun 2,56 milliuns francs ils proxims 60 onns.

Decisiun cun effect da signal

Per Jon Erni da «mia Engiadina» è la decisiun dals da La Punt da grond’impurtanza ed haja er in’influenza sin ils proxims pass.

L'auta participaziun ed il cler Gea dal pievel fan plaschair, èn dentant er in'obligaziun.
Autur: Jon Ernimia Engiadina

Vuschs criticas envers il project da Norman Foster, n’hajan ins betg udì e legì bleras fin uss – era betg durant ils ultims dis ch’il project è vegnì preschentà en detagl a la populaziun. Resalvas dettia davart singuls detagls, sco il parcadi existent che svaniss u era davart la furma da l'InnHub che l'architect ha previs. Quel haja dentant experientscha da stgaffir lieu per lavurar ed attira cun ses num er investiders internaziunals, ha suttastritgà Jon Erni.

Proxims pass

Sco ch’il chanzlist da La Punt, Urs Niederegger ha declerà ad RTR, vuless ins tractar gia l’atun 2019 ils proxims dus puncts decisivs en connex cun il center planisà. Quai èn la revisiun dal plan da zonas cun approvaziun dal Chantun ed il midament da la planisaziun da quartier.

RR novitads 06:00