Il venderdi saira, curt avant mesanotg, ha avertì in automobilist, ch’ina chasa a Valchava ardi. Enfin ch’ils pumpiers eran sin il lieu ha el guardà, sche nagin sa chatta en la chasa. Là n’eran dentant naginas persunas. En pli ha el alarmà ils abitants da las chasas vischinas per che quels sappian mitschar.
Las flommas da la chasa – ch’era per vegnir renovada – èn siglidas sin ina chasa cunfinanta.
Acziun dals pumpiers da Val Müstair e dal Tirol dal Sid
Ils pumpiers da la Val Müstair, ch’eran arrivads cun 47 persunas, han survegnì sustegn da 40 pumpiers dal Tirol dal Sid. Per pudair survegnir controlla dal fieu han ils pumpiers stuì cuvernar ils tetgs da tut las duas chasas. Ellas èn vegnidas destruidas cumplettamain.
L'inspectur districtual Peter Giovanoli era curt suenter l'ina sin plaz per sustegnair ils pumpiers. Sin dumonda da RTR ha el quintà, ch'il fieu era sut controlla curt suenter las 4 la bunura. I saja stà ina fortuna, che betg dapli chasas hajan tschiffà fieu e che naginas persunas sajan vegnidas blessadas. Actualmain sa chattan anc dus pumpiers sin il lieu per controllar la situaziun, ha ditg il cumandant dals pumpiers Val Müstair, Andrea Vital, a RTR.
Il donn material munta a radund in milliun francs. Persunas n’èn betg vegnidas feridas.
La polizia chantunala examinescha uss il motiv dal fieu.
RR novitads 10:00++