Siglir tar il cuntegn

Engiadina In maraton sco mintg'onn – ma schon in pau auter!

Il 50avel Maraton da skis engiadinais è ina sfida speziala per ils organisaturs. Menduri Kasper, il CEO dal Maraton da skis engiadinais, s'allegra sin l'ediziun da giubileum.

Menduri Kasper.
Legenda: Menduri Kasper, il CEO dal Maraton da skis engiadinais. RTR, David Spinnler

Organisar il 50avel Maraton da skis engiadinais è en sasez sco organisar mintg'autra ediziun da la pli gronda cursa da passlung populara en Svizra – ina sfida. Quai di il CEO dal maraton Menduri Kasper. Organisar il 50avel maraton è dentant ina sfida anc pli speziala. Gia be pervi da la fulla da persunas. Las 14'200 annunzias han purtà enorm blera lavur als organisaturs.

Ed anc bler dapli glieud avess vulì far il maraton. Il secretariat dal maraton è vegnì inundà cun telefonats. Ussa sa legran ils organisaturs sin dumengia, cura che la cursa da giubileum va finalmain liber. Il meglier che po capitar per Menduri Kasper è, che tut ils curridurs e tut las curriduras arrivan cuntents en l'arrivada a S-chanf.

RR actualitad 12:00