Il glatscher Morteratsch lieua pervi dal stgaudament dal clima mintg'onn per plirs meters. Quai vul il glaziolog Felix Keller franar.
L'idea è da zugliar il glatscher en naiv durant la stad, uschia ch'il glatsch suten na po betg luar. Ils studis fatgs mussian che quai funcziunia, ha Felix Keller raquintà en l'emissiun Profil dad RTR.
Sin la Diavolezza per raschuns praticas
Cunquai ch'i dat gia ils indrizs da far naiv sin la Diavolezza, ed igl è quasi sin la medema autezza sco il glatscher Morteratsch, vegn il glatscher artifizial creà là davent dal favrer. I duai dar in sochel da glatsch da 20 sin 20 meters che vegn lura la primavaira zuglià cun naiv.
La vischnanca da Puntraschigna sustegn il project cun 69'000 francs.
Cura e sche insumma che lantschas da far naiv vegnan installadas al glatscher Morteratsch, è anc avert. Quai sa decida pir suenter ils tests sin la Diavolezza.
RR actualitad mezdi 11:00
