Mario Cavigelli dì ch'i dettia ina gronda bainvulientscha da la vart dal chantun per promover implants solars. I dettia in'avertezza dals uffizis per collavurar vi da tals projects. I saja er bain pussaivel che Scuol vegnia a realisar ses project en in curt temp. El intuna dentant che las leschas da la protecziun da la natira e da la cuntrada u las auas duain vegnir resguardads, er sch'ins veglia far prescha.
Protecziun da la cuntrada vul vesair il project concret
Raimund Rodewald da la Fundaziun svizra per la protecziun e la tgira da la cuntrada di ch'els sustegnian en general l'energia solara. Els prefereschian dentant da montar implants sin tetgs d'edifizis existents u per exempel sin rempars da lavinas, la saja il potenzial il pli grond en Svizra. Els na veglian dentant betg refusar dal tut implants sin surfatschas libras sco a Scuol. Quest project na saja dentant anc betg sviluppà avunda per trair ina decisiun, uschia Rodewald.
La Fundaziun per la protecziun vegnia a sustegnair projects solars cumportabels per la cuntrada. Tar il project da Scuol spetgian els che la vischnanca ed il chantun collavurian per propi chattar ina buna soluziun.