La gruppa anonima da Facebook «Gegen Bikeverbot Muntatsch» ha publitgà fotografias da differents objects ch’èn vegnids posiziunads cun intenziun sin la senda per impedir il passagi. Cumenzà cun laina plunada, sur gronda crappa, fin tar in entir bloc d’ina planta, han nunenconuschents mess entamez la senda. Ina senda ch'è dada libra uffizialmain da la vischnanca sco biketrail.
Privlus e primitiv
Christoph Bütler da la Bike School Engadin ha declerà ad RTR ch’el e ses collegas hajan gia gì dad allontanar pliras giadas ils impediments privlus sin il trail. Tenor el possian ins discurrer d’ina acziun primitiva e surtut privlusa. Entant haja era la gruppa da lavur communala mess puspè ord via ils impediments. Ni la vischnanca, ni la Bike School Engadin veglian actualmain purtar plant encunter nunenconuschent tar la polizia.
Destinaziun turistica renviescha responsabladad
Sin dumonda dad RTR declera Roberto Rivola, pledader da la destinaziun Engiadina San Murezzan, ch’ins deploreschia quests eveniments, ch’il cas sco tal restia dentant en la cumpetenza da la vischnanca da Samedan.