«The sky over nine columns» sa numna la sculptura imposanta che sa chatta ussa giusum il Lai da San Murezzan. Heinz Mack n’ha betg creà ella spezialmain per quest lieu. La sculptura è sin viadi tras l’Europa.
La sculptura
Dal 2012 fin dal 2014 ha lavurà Heinz Mack vi da questa sculptura. Per la prima giada è questa vegnida exposta durant la biennala a Venezia. Pli tard è ella vegnida transportada ad Istanbul e suenter a Valencia.
La sculptura «The sky over nine columns» consista da nov colonnas da passa 7 meters autezza, da 850’000 plattinas d’aur e paisa dapli che 50 tonnas.
L’artist Heinz Mack
Heinz Mack, naschi il1931, è enconuschent sco artist da la glisch. Il 1957 ha el fundà la gruppa «Zero» ensemen cun Otto Piene ed auters artists.
Ils artists da la gruppa Zero dovran la glisch ed il moviment sco nova furma d’expressiun en lur art, quai per surmuntar il pessimissem dals onns suenter la guerra. Per che la sculptura haja il dretg effect tschertga l’artist Mack lieus cun ina glisch speziala. Quai è era in motiv che la sculptura passenta l’enviern en Engiadina.
Il viadi da la sculptura cuntinuescha probablamain l’onn proxim.