Siglir tar il cuntegn
cuntegn

Engiadina Il Tour de ski salva in pau Minschuns

Il territori da skis Minschuns en Val Müstair ha gì enfin ussa ina stagiun catastrofala – senza naiv. L'incumbensa da far la pista per il Tour de ski salva perquai in pau la stagiun.

Minschuns
Legenda: Uschia stuessi vesair ora a Minschuns. I n'ha dentant actualmain absolutamain nagina naiv. ANR

Il territori da skis da Minschuns ha enfin ussa ina fitg nauscha stagiun. I n'ha nagina naiv ed era il pitschen lai per far naiv artifiziala è vid. Uschia na datti insumma nagina pussaivladad dad ir cun skis. Be il restorant sin l'Alp da Munt è stà avert tranter Nadal e Bumaun.

Tour de ski salva in pau la stagiun

Uschia ha l'incumbensa da producir la naiv atrifiziala e far las loipas per las cursas da passlung dal Tour de ski a Tschierv salvà in pau la stagiun. Grazia a questa incumbensa han almain 4 persunas gì lavur cun la producziun dals radund 70'000 meters cubics naiv e cun la preparaziun da la pista.

Speranza sin votaziun dals 12 favrer

Ils responsabels da Minschuns na pon ussa dentant far nagut auter che spetgar sin naiv giu da tschiel e sin la votaziun da referendum dals 12 da favrer. Lura decida la populaziun da la Val Müstair anc ina giada a l'urna davart il project da construir in resort da vacanzas a Tschierv, e da construir ina pendiculara si Minschuns. Quest project cumpigliass era in sistem per ennaiver almain la pista da Minschuns enfin a Tschierv.

RR actualitad 17:00