Siglir tar il cuntegn
cuntegn

Engiadina Il referendum – esser pront per tut las eventualitads

A la radunanza dals delegads da la Corporaziun Energia Engiadina ins è vegnì infurmà davart il proceder per mantegnair ils tschains d’aua.

Not Carl, il president da la Corporaziun Energia Engiadina pro sia preschentaziun
Legenda: Not Carl, il president da la Corporaziun Energia Engiadina RTR, Georg Luzzi

Represchentants da l’economia, da la forz’electrica, l’uniun da las citads e era il forum da consuments vulan in model flexibel per ils tschains d’aua. Il existent saja antiquà. Il pretsch da 110 francs/kwb (kilowatt prestaziun brutta) saja memia aut. Perquai pretendan els ina varianta flexibla.

Raps per organisar in referendum

Er la cuminanza d’interess da las vischnancas concessiunarias da tut il chantun Grischun (IBK) duai reservar raps per in eventual referendum, betg mo la Corporaziun Energia Engiadina. Cun quest’acziun vulan ins surtut dar in tschegn als adversaris e natiralmain era esser pront sche vegn serius cun sbassar ils tschains d’aua.

Tschains d’aua – la pitga da las vischnancas engiadinaisas

Radund 5 milliuns francs entradas mainan ils tschains d’aua als vitgs da S-chanf lung il flum En enfin a Valsot. Senza quellas entradas annualas fiss la situaziun finanziala da las vischnancas fitg desolata.

Fondo dals 5% dals tschains d’aua

Sper las tractandas formalas han ils radund 20 preschents era consentì ils sustegns finanzials da radund 440’000 francs ord la cassa dals 5% ad instituziuns culturalas e socialas.

RR actualitad 08:00