Siglir tar il cuntegn
Inhalt

Engiadina Il «Hermelindis» a Samignun è curt avant serrar las portas

Il center da cumpras e restaurant «Hermelindis» a Samignun vegn a serrar las portas. Quai ha decidì la societad che gestiunescha «Hermelindis», la Dufry Samnaun SA. 30 plazzas da lavur èn periclitadas.

Il center da cumpras Hermelindis a Samignun
Legenda: Il Hermelindis sto serrar las portas. RTR / David Spinnler

La manadra da gestiun dal «Hermelindis» Olga-Maria Weissenberg Zegg ha confermà envers Radiotelevisiun Svizra Rumantscha in rapport da la gasetta «Blick». La societad che gestiunescha il Hermelindis, la Dufry Samnaun SA, haja tratg la decisiun da serrar las portas.

Taglia speziala disturba

Ina raschun per serrar il «Hermelindis» saja la situaziun economica fitg difficila pervi dal ferm franc svizzer. En pli saja la taglia speziala d'economia a Samignun in problem. Quella è tenor Weissenberg Zegg bler memia auta. Weissenberg Zegg ha inoltrà ina petiziun che pretenda da midar questa taglia, che remplazza a Samignun la taglia sin la plivalur.

La vischnanca sa dosta

Il president communal da Samignun Hans Kleinstein è dentant da l'avis, che tut las radund 40 butias a Samignun hajan da pajar las medemas taglias. Oz saja quai en pli uschia che la taglia speziala d'economia da 3.75% da la svieuta giaja plainamain a la Confederaziun. Da quella taglia na restia nagut pli tar la vischnanca. Kleinstein deplorescha la fin dal «Hermelindis» e la perdita da las plazzas da lavur. Bleras da quellas sajan dentant occupadas da cunfinaris.

RR actualitad 07:00