Per il chantun Grischun èn ils fugitivs ch'arrivan ina pulita sfida. Ins è avisà sin mintga letg. Tut sto ir pulit svelt. Uschia era succedì cun il center temporar a Valchava nua ch'ils emprims requirents d'asil èn arrivads ier e sa mussads pauc intgantads. Davent dal center a Laax, ch'è datiers da la chapitala grischuna, èsi ì en la periferia en Val Müstair. Ch'i giaja memia lunsch che fugitivs possian far la schelta nua ch'els veglian ir, ha ditg il minister da giustia Christian Rathgeb.
Chantun è cuntent da mintg'offerta
Il chantun haja da chattar e dar in suttetg e saja cuntent da mintg'offerta. Che cun Werner Braun metta ina persuna privata a disposiziun ina chasa e maina era gist sezza quella, è in novum en il Grischun. Cunquai ch'ils centers existents èn als cunfins da las capacitads saja stà da proceder svelt. Las autoritads en Val Müstair sajan vegnidas infurmadas da l'uffizi da migraziun.
Mesiras urgentas pretendian in proceder d'urgenza
Quai saja è stà il cass cun ils centers temporars a Cuira ed a Domat. Che la populaziun da la Val Müstair vegn pir orientada quest'emna, suenter ch'ils emprims requirents èn gia sa chasads, haja gì da far cun mancanza da temp, ha ditg il minister da giustia vinavant.
Gia avert 6 novs centers
Per pudair dar suttetg a requirents d'asil e fugitivs ha il chantun be quest onn avert 6 novs centers cun plaz per mintgamai 70 fin 100 perunas. Intgins èn permanents, auters temporars, sco quel a Valchava, che vegn puspè serrà la primavaira. Ch'ins è als cunfins cun las capacitads mussia er il fatg ch'il chantun veglia proximamain orientar nua en il Grischun ch'i vegnia avert dus ulteriurs centers per requirents d'asil.
RR novitads 20:00