Siglir tar il cuntegn
cuntegn

Engiadina Igl è temp d’unir las forzas tar ils chatschaders grischuns

Ils votums dals singuls pledaders a la radunanza da delegads dals chatschaders patentads grischuns a Müstair han adina puspè suttastritgà ch’ins duai uss sa concentrar sin l’unitad.

chamutschs e cornas
Legenda: Ina paraid da decoraziun a la radunanza da delegads a Müstair. RTR, A. Caprez

Quai per surmuntar in temp intensiv che spetga sin la politica da chatscha ils proxims onns. «Be cun ina vusch unida chattain nus udida», ha suttastritgà l’inspectur da chatscha grischun, Georg Brosi, davant ils 350 preschents en sala a Müstair.

3 plazzals da fabrica

Il cusseglier guvernativ Mario Cavigelli discurra perfin d’ina fasa turbulenta che regi tar la politica da chatscha grischuna. Cun duas iniziativas ch’èn actualmain pendentas e la revisiun da la lescha da chatscha saja la chatscha adina puspè tema tar la populaziun en tut la Svizra.

Che la critica envers la chatscha è era preschenta tar las singulas secziuns da la societad, demussa er il fatg ch’ils delegads n’han betg tractà sco auters onns pliras moziuns durant la radunanza.

Ils chatschaders grischuns han festegià lur radunanza quest onn a Müstair
Legenda: Ils chatschaders grischuns han festegià lur radunanza quest onn a Müstair. RTR, A. Caprez

Chatscha 2017 cumenza ils 2 da settember

Sper ils rendaquints ed ils differents rapports, ha la radunanza da delegads er approvà la recumandaziun da la societad a maun da la regenza e l’uffizi da chatscha grischun, pertutgond las datas da chatscha per il proxim onn. Proponì vegn che la chatscha grischuna cumenza il proxim onn ils 2 da settember 2017.