Siglir tar il cuntegn
Inhalt

Engiadina I suffla in nov vent

Il cussegl d'administraziun da l'institut Otalpin Ftan sa retira in corpore sin la radunanza extraordinaria ils 19 da settember. Era il rectur Sven A.Kohler va, communitgescha il team strategic che ha cumenzà sia lavur il mez d'avust.

Per entant lavura il rectur Kohler anc e survegn sustegn d'ina nova gruppa strategica. Da quella fa era part Beatrice Tschanz, l'anteriura scheffa da communicaziun da la Swissair.

En il team strategic èn 7 persunas: Jon Peer (strategia, restructuraziun), il Cusseglier naziunal da Zug Gerhard Pfister (svilup da la scola, concept d'internat), Paul Häring (finanzas, dretg), Sven A.Kohler (manaschi da scola, novas purschidas), Guido Parolini (represchentant da la regiun Pro Engiadina Bassa), Beatrice Tschanz (communicaziun e marketing) ed Andri Lansel (secretari).

Il team strategic propona d'eleger sco novs commembers dal cussegl d'administraziun: Jon Peer, Christian Fanzun, Sven A.Kohler, Paul Häring e Beatrice Tschanz.

Flury fa liber la via

Er Johannes Flury, che era avant bain in onn vegnì clamà a Ftan per sa gidar cun l'institut, na fa betg pli part da la nova gruppa strategica da l'institut. Flury n'è dentant betg dischillus da questa decisiun. Sch'ins saja persvas da metter a disposiziun il sez en il cussegl d'administraziun, saja quai pli scort ch'ina nova squadra surpiglia. I saja er meglier che la nova squadra possia gist tschertgar in nov directur per l'Institut Otalpin.

Squitsch da metter a disposiziun ils posts en il cussegl d'administraziun na haja quai dentant betg dà. Il cussegl d'administraziun haja basegn da la fidanza dals acziunaris e da la populaziun e quella fidanza na saja betg pli stada la medema.