Siglir tar il cuntegn
cuntegn

Engiadina Huānyíng guānglín - Cordial bainvegni

Il martgà chinais pel turissem d’enviern creschia ad in crescher. En vista als gieus olimpics d’enviern a Beijing duessan fin il 2022 radund 300 milliuns chinais daventar sportists d’enviern. In potenzial nua che era ils turistichers en Grischun vulan profitar.

In uffant chinais sin skis che bitta ina borla da naiv.
Legenda: Anc è il giast chinais ina minoritad en Grischun, dentant dess quai sa midar. mad

«China Inbound Service» - uschia sa numna il project da cooperaziun tranter las dus destinaziuns turisticas Tavau Claustra ed Engiadina San Murezzan ensemen cun la Scola auta da tecnica ed economia Cuira (HTW) e cun partenaris regiunals, sco hotels e butias. Dapi in onn ha questa cooperaziun sa fatschentà en differents workshops cun la dumonda co ins vul en l’avegnir pli fitg trair a niz il potenzial dal martgà chinais creschent cun optimar la spierta sin il lieu.

Cun agid d’in questiunari realisà cun giasts chinais che han passentà lur vacanzas l’ultima stagiun d’enviern en ina da las dus destinaziuns, han ins l’emprim empruvà da definir in nov profil dal giast chinais e per l’autra han ins erui las pretaisas e las aspectativas ch’in giast chinais ha envers in lieu da vacanzas.

Il recept

Per generar en l’avegnir dapli pernottaziuns propona la retschertga da vegnir davent dal turissem dal di. La gruppa en mira duess en l’avegnir esser in giast chinais che enconuscha gia il pajais e che resta almain ina notg. Mo uschia saja quai pussibel per ina destinaziun turistica da porscher products individuals sviluppads exclusivamain per ils basegns dal giast chinais e da betg pli stuair esser dependents dad offeriders da viadi.

Las pretaisas

La retschertga mussa plinavant ch’il giast chinais stima oravant tut nossa cuntrada muntagnarda, il service e l’infrastructura. Betg cuntentaivel è dentant la variaziun da mangiativas chinaisas e l’infurmaziun en lingua chinaisa.

La realisaziun

En il mument n’è il martgà da giasts chinais en Grischun anc betg uschè grond. Tar la destinaziun Engiadina San Murezzan per exempel, che acquirescha giasts or da 17 differents pajais, figurescha il martgà chinais cun in zic dapli che 10’000 pernottaziuns l’onn sin posiziun diesch. En l’avegnir duess quai sa midar. La pli gronda sfida en vista è tenor Ariane Ehrat, la directura da la destinaziun Engiadina San Murezzan dentant da betg perder or da l’egl ils martgads principals e da restar fidel a la strategia existenta. Schebain il martgà chinais ha grond potenzial vul ins era en il futur optimar la spierta pass per pass.

Concret vul quai dir, metter dapli pais sin infurmaziuns en lingua chinaisa sco per exempel cartas da menu u signalisaziuns da vias e sendas, ubain metter a disposiziun guidas scoladas che duain accumpagnar ils giasts e ch’enconuschan la cultura chinaisa e san discurrer la lingua.

Legenda:
Pernottaziuns da persunas chinaisas en il Grischun