Avant quatter dis ha il possessur Johann Brugger publitgà sin facebook ch'en ses hotel na vegnan betg pli resguardadas las mesiras da corona prescrittas. Sin quai ha la vischnanca da Scuol dumandà la Polizia chantunala per agid d’uffizi. Fin venderdi suentermezdi n'è capità nagut, l’hotel è anc adina avert.
In proceder dovra temp
Sin dumonda da RTR ha declerà la pledadra da la Polizia chantunala ch'in tal proceder dovria temp. En in prim pass sto la polizia far in rapport per maun da la vischnanca. Quella ha lura d’inoltrar il rapport tar l’uffizi da sanadad. Suenter sto l’uffizi relaschar in’ordinaziun uffiziala.
L'uffizi da sanadad relascha però be in’ordinaziun uffiziala sch'il suspect vegn propi era confermà. Il mument n'è quai betg il cas.