Siglir tar il cuntegn

Engiadina Happy End: Tuttina betg la fin per la WEGA San Murezzan

La libraria e papetaria entamez la vischnanca na serra uss tuttina betg sias portas per dal bun. Per la gestiun han ils responsabels chattà ina soluziun a partir dal zercladur.

chasa cun entrada Wega
Legenda: Uss datti tuttina ina cuntinuaziun da la libraria a San Murezzan. engadin.stmoritz.ch

Sco ch’il manader actual da la WEGA a San Murezza, Philipp Guyer, ha ditg a RTR surpiglia la chasa editura Baeschlin e Schuler la butia per il prim da zercladur 2018. La butia vegn a restar serrada in'emna per far la surdada.

Cun in egl larmond...

Cun quai che Philipp Guyer ha da dar or da mauns ina butia da tradiziun, ch'è dapi trais generaziuns en possess da la famiglia Guyer-Halter, na saja il midament betg propi simpel per el, ha deplorà il manader da gestiun.

...e cun in egl rient

Dentant è Guyer er fitg grat, che l’istorgia da la libraria e papetaria na va be uschè a fin. El spera però ferm, che la populaziun sustegnia er la purschida da ses successurs. Senza quel sustegn na saja in’existenza en l'Engiadina cun la gronda concurrenza digitala betg pussaivla.

Il cumenzament da mars era vegnì enconuschent, che la libraria e papetaria WEGA haja da serrar sias portas per dal bun.

RR novitads 17:00