Sco che l’iniziant da la cuminanza d’interess IG Art Sud, Alf Bolt ha declerà, prevesa il concept «Seepferd» in’utilisaziun da l’anteriura halla da chavaltgar sco center cultural. Per exempel per teater, film, saut u exposiziuns. La vischnanca duess restar tenor l’idea dals iniziants vinavant possessura da la halla. Ella surdess dentant a maun d’ina cunvegna da prestaziun, la gestiun ad ina societad.
Tuttina ha sveglià in auter aspect da la preschentaziun da la gievgia anc dapli attenziun che las visiuns da la IG Art Sud:
Squitsch sin autoritads
Il fatg che la IG Art Sud s’ha drizzà a las medias e betg directamain a la vischnanca da San Murezzan, declera Alf Bolt cun ina communicaziun disturbada ils ultims dus onns tranter els e las autoritads communalas. Ses agir insolit n’haja dentant betg da far insatge cun il cumbat electoral per il presidi a San Murezzan, sincerescha l’iniziant.
Il schef da l’uffizi da construcziun San Murezzan, Claudio Schmidt è stà surprais che la vischnanca n’è betg stada envidada a la conferenza. Quai surtut cun quai che la vischnanca aveva communitgà dacurt da vulair elavurar in nov concept d’utilisaziun per la halla da chavaltgar.
Critica vid l'agir da la vischnanca da San Murezzan
Gia avant trais onns aveva inoltrà la gruppa d’interess in project, che correspunda per gronda part al concept actual «Seepferd». Quella giada era la vischnanca sa decidida per in auter project, per il concept «Futura». «Futura» ha fatg entant naufragi pervi da la finanziaziun.
Provocar reacziun da la vischnanca
Tenor Alf Bolt n’haja la vischnanca betg lavurà suffizientamain vi dad in niz futur dal stabiliment. El giavischa perquai da vegnir integrà immediatamain, ensemen cun auters interessents, en il svilup dal project da la vischnanca. Cun l'acziun insolita da clamar las medias ad ina preschentaziun dad in concept, ch'era per gronda part gia enconuschent, spera l’iniziant che las autoritads communalas da San Murezzan, s’annunzian uss tar la gruppa d’interess Art Sud.
Stabiliment da sport dal 1910
La halla da chavaltgar sper il Lai da San Murezzan è en possess da la vischnanca dapi il 1990. Cun quai ch’il tetg è periclità da crudar ensemen, na vegn la halla betg pli duvrada per il sport da chaval – e quai gia dapi il november 2013. Per sanar e reinvestir en l’edifizi, aveva la vischnanca tschertgà soluziuns cun investiders privats.
RR actualitad 17:00
