Siglir tar il cuntegn
cuntegn

Engiadina Guido Mittner è il nov president dal Tour de Ski

Il comité d’organisaziun dal Tour de Ski è cumplet. Guido Mittner, oriund jauer, è vegnì elegì sco president. L’occurrenza l'emprim da schaner 2019 ha definitivamain lieu en la Val Müstair.

Il nov president Guido Mittner durant ils campiunadis mundialas dal 2017 a San Murezzan.
Legenda: Il nov president Guido Mittner durant ils campiunadis mundials dal 2017 a San Murezzan. Posta Ladina/Eugenio Mutschler

A l’entschatta da december aveva Clà Filip Pitsch desditg sia plazza. Tras quai era l’avegnir dal Tour de ski en la Val Müstair tuttenina intschert.

Il vitg da Val Müstair aveva però signalisà cleramain da vulair proseguir cun il Tour de ski. Per la Val Müstair è quella cursa in'impurtanta occurrenza per sa posiziunar sco regiun da passlung, oravant tut era perquai che la Val Müstair è la patria dals curridurs Gianluca e Dario Cologna.

Ina sfida spetga Mittner

Cun Guido Mittner è il comité d'organisaziun cumplet ed il Tour de ski da l'emprim da schaner 2019 ha definitivamain lieu en la Val Müstair.

Sin Guido Mittner spetga ussa blera lavur. Per in vitg da radund 1'400 abitantas ed abitants è in tal event ina gronda sfida organisatorica e logistica. Actualmain saja il comité d'organisaziun vidlonder da tractar sch’ins veglia organisar ina u duas etappas en la Val Müstair.

RR novitads 12:00