Siglir tar il cuntegn
Inhalt

Engiadina Grev accident – annullà las cursas da White Turf

Suenter in grev accident durant la prima cursa dal di han ils organisatus annullà tut las cursas da la terza dumengia da White Turf. In chaval da cursa è crudà sin il lai, dus auters persuenter era. In jockey è vegnì transportà a l'ospital cun la Rega. In dals chavals ha stuì vegnir durmentà.

Legende: Video L'accident al White turf – Tge consequenzas duain seguir? abspielen. Laufzeit 02:32 Minuten.
Or da Telesguard dals 27.02.2017.

L'accident è capità durant l'emprima cursa dal di. En la fasa finala da la cursa da galopp sur 1'300 meters è «Holidayend», il chaval a la testa, sa stgarpitschà en plaina cursa. Causa ina schlavada en il glatsch è el rut tras la pista da cursa. Ils dus chavals suenter el n'han betg pudì guntgir ed èn medemamain crudads.

In da quels chavals, «Boomerang Bob» da la Gronda Brittania, è sa blessà grevamain. Il veterinari da la cursa ha stuì durmentar el. George Baker, il jockey dal chaval, è era blessà ed è vegnì transportà da la Rega en l'ospital chantunal a Cuira. Là è sa mussà, che las blessuras dal jockey n'èn betg grevas.

In stgarp en il glatsch

Il glatsch dal lai ha tenor Thomas Walther, il president da la societad da cursas San Murezzan, ina grossezza tranter 60 e 70 centimeters. Il chaval saja rut en radund 150 meters avant l'arrivada tar in lieu, nua che l'aua dal lai era penetrada si tras in stgarp en la vetta da glatsch ed haja schlavada quella.

ambulanza da chavals.
Legenda: Ad in dals chavals da cursa n'han ins betg pudì gidar pli. Il veterinari ha stuì durmentar quel chaval. RTR / Dario Müller

Tenor il president da la societad da cursas San Murezzan, Thomas Walther, n'han ins betg pudì prevesair quest accident. La giuria da la cursa haja taxà la bun'ura avant las cursas la pista sco excellenta.

La procura publica investighescha en chaussa.

Dad annullar la dumengia da cursas saja vegnì quittà dal public cun applaus, scriva il comité da la cursa en ina communicaziun.

RR novitads 14:00++