Siglir tar il cuntegn

Engiadina Glisch verda per lingia d’auta tensiun Pradella-La Punt

La lingia d’auta tensiun vegn rinforzada sin ina lunghezza da 49 kilometers cun fils supplementars sin 2 x 380-kV. Cun quai vegn eliminada ina stretga en la rait electrica en Engiadina Bassa.

lingia d'auta tensiun
Legenda: Il permiss da fabrica per la lingia d'auta tensiun tranter Pradella e La Punt è valid dapli ils 11 da matg 2016. RTR, S. Derungs

L’inspecturat federal d’installaziuns a current ferm, ha approvà ils plans per rinforzar las lingias existentas. Cun quai vul la Swissgrid er augmentar la segirtad da provediment en la rait da transmissiun svizra ed europeica.

OEE realisescha vastas mesiras da cumpensaziun

Sco mesira da cumpensaziun ecologica per la cumplettaziun da la lingia d’auta tensiun e per segirar il transport da forza idraulica davent da la centrala Ova Spin, vegn renatiralisada la lingia al liber existenta da las Ovras electricas d’Engiadina (OEE) tranter Pradella e Zuoz. Quella duai vegnir remplazzada tras ina nova lingia a cabel sutterrana. Per pudair far quai duain las OEE stipular 643 contracts da servitut cun proprietaris.

Pitgas svaneschan pass per pass

Suenter la realisaziun dal cabel sutteran, pon vegnir allontanadas las radund 1’000 pitgas da lain, uschia che la cuntrada e l’ambient vegnian deliberads da maniera persistenta dad immissiuns.

Cunvegna cun recurrents

Sco quai che la Swissgrid e las ovras electricas d’Engiadina scrivan en lur communicaziun, vev’ins inoltrà en december dal 2013 il dossier d’approvaziun per il project tar l’inspecturat federal.Cunter quel project eran entrads divers recurs. Ch’ins haja dentant savì evader tscherts puncts critics e chattar in cumpromiss cun tut ils recurrents. Sin basa da questa cunvegna ha l’inspecturat uss concedì il permiss da fabrica per la lingia d’auta tensiun. Cun las lavurs vul ins cumenzar durant l’onn 2017.

RR novitads 12:00