Tut ils iniziants dal project èn fitg cuntents: la Snowsports St. Moritz, la scola da skis svizra San Murezzan, ils commembers da l’associaziun «Save Edy» e la Engadin Mountains SA. Cun il permiss da bajegiar è vegnida la reconstrucziun da la sculptura «Edy» a Salastrains sur San Murezzan bainquant pli datiers.
30 dis temp da recurs
Ils proxims 30 dis èn decisivs. Opponents han uss la pussaivladad d’inoltrar anc in recurs encunter l’intent da plazzar la sculptura da 19 meters autezza en la regiun da skis.
100’000 francs per realisar il project
L’associaziun «Save Edy» è dentant da buna speranza da vegnir ensemen cun ils raps necessaris per realisar il project. Fin oz èn quels anc betg segirads – ma enfin la primavaira 2018 vul l'associaziun avair ensemen las finanzas.
«Edy» – il magnet turistic
Sco sculptura simpatica aveva «Edy» atratg l'interess durant ils campiunadis mundials da skis: Da passa 165’000 aspectaturas ed aspectaturs directamain a San Murezzan – e da passa 100 milliuns a la televisiun. L'idea dals iniziants è da trair a niz il potenzial dad «Edy» er en l'avegnir per attrair blers giasts d’enviern en la regiun da San Murezzan.
RR novitads 10:00