Giuvna da la bassa cumbatta per schlittada da Puntraschigna

Mo 5 pèrins han sa participads sonda passada a la schlittada da Puntraschigna. Quai dapi che questa n'aveva divers onns insumma betg pli gì lieu. Memia pitschen è l'interess dals giuvens a Puntraschigna. Tania Spörri che ha in marus da Puntraschigna na vuleva betg acceptar quai.

L'entira gruppa da la schlittada.

Legenda da maletgs: Ina pitschna gruppa ch'è motivada da laschar reviver la schlittada Puntraschigna. RTR, V. Rominger

Ed ella ha gì success. Era sche be 5 pèrins han fatg part, els han fatg quest pass, ha ditg in dals commembers. Igl è in cumenzament, di Tania Spörri ch'è pli che cuntenta che la fin finala tut ha funcziunà. Era la naiv è anc vegnida per ir cun las schlitras tratgas da chavals enfin la Val Roseg a Puntraschigna.

Sche la giuventetgna n'ha betg interess dumandar auters

Quai è l'idea per l'onn che vegn. Ina schlittada cun 5 pèrins u il dubel e dapli n'è betg il medem. Perquai vul Tania Spörri far l'onn che vegn la proposta, da dumandar era persunas ch'èn betg pli commembras da l'uniun da giuventetgna sch'els vulan participar a la schlittada. Impurtant saja che la tradiziun na mondia betg a perder.