Siglir tar il cuntegn

Header

cuntegn

Engiadina Gianna Nannini unplugged a San Murezzan

La vusch dal rock talian è vegnida en Engiadina per in concert dal tuttafatg spezial. Numnadamain en il lieu da luxus a San Murezzan, en las localitads da l’hotel da 5 stailas Badrutt’s Palace.

La chantautura taliana ha dà in concert en in pitschen rom exclusiv. Las cartas per il concert custavan tranter 200 e 900 francs. Durant il concert da bun duas uras ha Gianna Nannini preschentà ses gronds hits unplugged.

Gianna Nannini
Legenda: Gianna Nannini a San Murezzan RTR/David Spinnler

Suenter 20 onns puspè en Engiadina

Che la dunna da 63 onns ha dà in concert a San Murezzan haja da far cun sia passiun per las muntognas ed il sport d’enviern. Ella veglia mussar a sia figlia Penelope ils differents sports là, nua ch’ella aveva sezza emprendì da ses a bab d'ir cun skis. Ils ultims onns n’era ella dentant betg pli da vesair en Engiadina, causa che la val e sia clientella na sajan betg pli uschè autentics.

audio
Bunura: Gianna Nannini a San Murezzan
ord Actualitad dals 07.01.2017.
laschar ir. Durada: 3 minutas 12 Secundas.

Concert fulminant

«Vai mamma rock» clamavan vuschs talianas ord il public. E la «mamma rock» ha dà in concert sco schi fissan anc adina ils onns da ses gronds hits sco «Latin Lover» u era ils onns 90 cun l'imni per il champiunadi mundial da ballape Italia 90. Ch'il public sesia sin las sutgas bellas dal Palace na vegniva dentant betg en dumonda per Gianna Nannini. Chanzun per chanzun ha ella entusiasmà il public uschia che nagin dals radund 150 aspectaturs seseva pli sin sia sutga.

RR actualitad 08:00

Artitgels legids il pli savens