Quasi tut la vita è Peider Lansel (1863-1943) s’engaschà per la lingua rumantscha. El ha scrit ed er translatà texts. Uschia ha el scrit cudeschs cun versins e texts per chantuns, ma er translatà poesias da litteratura mundiala en rumantsch, per exempel da Nietzsche, Heine, Goethe ed auters.
Tranter auter è Peider Lansel stà ins dals fundaturs dal «Chalender Ladin». En pli ha el era cumbattì per che la lingua rumantscha daventia la quarta lingua naziunala en Svizra, tge ch'è lura capità l’onn 1938.
Per ses engaschament a favur da la lingua e cultura rumantscha è el vegnì undrà il 1933 cun il titel «doctor honoris causa» da l’Universitad da Turitg. Pli tard ha el er retschavì il «Schillerpreis» per sias ovras poeticas.
Cumprà la baselgia cun il clutger
La famiglia da Peider Lansel ha vivì en Italia ed era sco bleras autras a Sent ina famiglia da «randulins». Sur stad turnava la famiglia Lansel en patria. Peider Lansel era in commerziant cun success ed ha uschia gì la pussaivladad da cumprar la baselgia ed il clutger da la famiglia Corradini.
Sisum en il clutger ha el chattà il lieu ideal per lavurar en ruaus. Là ha el pudì sa profundar en la cultura rumantscha e sia lavur sco poet.
La famiglia Piguet – ils possessurs da la baselgia San Peder
Gabriel Piguet è in sutbiadi da l'enconuschent poet Peider Lansel. El ed ulteriurs parents possedan la chasa, la baselgia ed il clutger a Sent. Lur finamira è da mantegnair la substanza uschè bain sco pussaivel.
Oz è l'anteriura chasa da Peider Lansel e sia famiglia ina chasa da vacanzas. Ma la famiglia Piguet ha adattà be minimalmain l’intern. Tut è restà oriund ed original. La stiva veglia cun purtrets da la famiglia, las stanzas en lain, perfin la maisa cun ils magiels da tinta e la penna per scriver èn anc da vesair. Peider Lansel ha vivì per part en Italia e perquai sa chattan qua era stgaffas e structuras en stil talian. Ina da las stanzas ha il plafond cun furmas e structuras da gip sumegliant a quellas en ils palazis talians.
La chasa e la baselgia cun il clutger èn be per part accessiblas publicamain. Tenor il possessur Gabriel Piguet è quest il segund dachasa da la famiglia, tge che duai restar uschia.
Las impressiuns dal redactur engiadinais
La chasa, las restanzas da la baselgia cun il clutger nua ch’il poet Peider Lansel lavurava èn be per part accessiblas. Il sutbiadi Gabriel Piguet ha avert las portas e manà il redactur sisum en il clutger e la baselgia San Peder.
