Las 10 ustarias che fan part da la purschida «Bun appetit Engiadina» èn spartidas da sisum l’Engiadin’Ota a Malögia, fin giudim a Cinuos-chel. I sa tracta per gronda part da gastronoms giuvens, suttastritga Gudench Campell. Tranter auter maina l'ustier il restaurant Veduta a Cinuos-chel.
Jau hai ditg subit gea per far part a l’acziun, betg be causa la situaziun actuala fitg difficila.
L’idea sco tala da «Bun appetit Engiadina» na saja betg nova, dentant na dettia fin uss era nagina purschida sumeglianta en Engiadina. L’offerta è in cudeschet cun buns per ils 10 restaurants. Almain duas persunas han da consumar cun quel bun. Il tratg principal dal menu ch'è pli favuraivel è gratuit.
Animar da scuvrir novs lieus
Cun questa acziun veglian ils ustiers engiadinais animar ils giasts da visitar er auters restaurants sco ch’els èn disads. Tenor Campell na garanteschia il cudeschet automaticamain ustarias plainas, dentant dat el in pau speranza ad el ed a ses collegas en sia branscha e quai en in temp che n’è insumma betg simpel. L’acziun «Bun appetit Engiadina» vala fin la fin da november 2021.