Fusiun da scolas primaras Segl fin San Murezzan n'è nagin’opziun

Tut las 3 vischnancas èn stadas da l'avis ch'i fetschia dapli senn da laschar en vischnanca las scolas, hai num en ina communicaziun.

Scola da Segl

Legenda da maletgs: Ils scolars primars da Segl e Silvaplauna duain restar en vischnanca swisspic.ch

Sco quai che la presidenta communala da Silvaplauna, Claudia Troncana, ha ditg envers RTR na fetschia betg senn da trametter ils scolars da Segl e Silvaplauna a San Murezzan a scola. Ina raschun saja la lingua d'instrucziun.

Segl e Silvaplauna èn numnadamain vischnancas bilingas, San Murezzan però monoling tudestg. Quai muntass che Segl e Silvaplauna stuessan furmar ina classa separada. Construir ina scola pli gronda a San Murezzan e laschar vidas quellas a Segl e Silvaplauna fissi la fallada via, uschia Troncana.

Punct da partenza

Vegnì a la discussiun èsi perquai che San Murezzan sto renovar e sanar la chasa da scola Grevas. Per manar vinavant il project ha San Murezzan vulì savair da Segl e Silvaplauna sch’ellas vesan en l'avegnir ina fusiun da las scolas. Suenter discussiuns èsi vegnì decis che quai n'è betg in’opziun. Ina collavuraziun pli stretga tranter las scolas da Segl e Silvaplauna saja dentant bain pussaivel, uschia Troncana vinavant.

RR novitads 20:00