Siglir tar il cuntegn
Inhalt

Engiadina Fundà societad per mantegnair la staziun a Lavin

Radund 110 persunas èn stadas preschentas dumengia, ils 21 d'avust a la fundaziun da la societad «Nossa Staziun» a Lavin. La finamira da la societad è da mantegnair la staziun da la Viafier retica nua ch’ella è ussa.

La gruppa da la fundaziun da la societad Noss Staziun
Legenda: La gruppa da fundaziun d. san.: Jürg Wirth (copresident) Padrot Friedt, Andri Steiner, Silvia Schlegel e Hans Schmid (copresident). RTR, Reto Mayer

Avant dus mais e mez aveva la Viafier retica infurmà davart duas variantas pussaivlas per renovar u spustar la staziun da la Viafier retica a Lavin. Gia lezza giada era quai cler che la gronda maioritad da la populaziun da Lavin è per mantegnair la staziun en vischnanca ed encunter in spustament.

Societad «Nossa Staziun» vul far squitsch

Ina gruppa da tschintg persunas a Lavin ha preparà la fundaziun da la societad «Nossa Staziun» per uschia pudair far dapli squitsch envers la Viafier retica ed envers il chantun. Dapi oz vala quella societad ufficialmain sco fundada.

La finamira da la societad è definida cleramain en ils statuts. La societad s’engascha per che la staziun da Lavin restia nua ch'ella è ussa. Plinavant duai quai era en l'avegnir esser pussaivel da far diever d'in urari da tren cumplet.

la staziun da Lavin en in model da chartun
Legenda: La societad fa reclama cun in model da chartun. RTR, Reto Mayer
Fegl d'annunzia per daventar commember da la societad Noss Staziun
Legenda: Fegl d'annunzia per daventar commember da la societad «Nossa Staziun». RTR, Reto Mayer