Siglir tar il cuntegn
Inhalt

Engiadina Fin per project Chasa Guarda

Il lieu d’inscunter Chasa Guarda na vegn betg realisà. Sco quai che la Fundaziun Pro Guarda communitgescha, mancan ils raps per quest project. Quant dals radund 3 milliuns francs, n'è betg enconuschent.

Legende: Video Nagina chasa Ursin a Guarda abspielen. Laufzeit 02:37 Minuten.
Or da Telesguard dals 16.05.2017.

In nov center cultural cun museum e biro da turissem, in lieu per far vendita directa da products indigens ed in nov da chasa per Uorsin. Quai era l’idea che la Fundaziun Pro Guarda aveva preschentà avant bunamain in onn.

Per radund 3 milliuns francs vulevan ins renovar ed inscenar da nov la Chasa Guarda, ch'è en possess da la Fundaziun Pro Guarda. L’idea resta dentant mo ina visiun. Sper il sustegn plitost modest en vischnanca è la raschun principala per il naufragi tenor ina communicaziun da la Fundaziun Pro Guarda oravant tut la mancanza da raps.

Manchentà ina schanza per commerzialisar l’istorgia da Uorsin?

Sco quai che Niculin Meyer, il pledader da la destinaziun Engiadina Scuol Samignun Val Müstair ha ditg envers RTR, deplorescha la regiun questa decisiun. Ensemen cun la Fundaziun Pro Guarda e Svizra Turissem vulevan ins numnadamain realisar in lieu per inscenar l’istorgia ed il film da Uorsin en la Chasa Guarda. Quest project saja dentant mo in da plirs. Dapi lura haja la destinaziun pudì realisar divers projects pli pitschens.

Ins haja empruvà tut il pussaivel per trair a niz anc meglier il potenzial economic dal film da Uorsin. Fin al di dad oz è quai in dals films svizzers cun il pli grond success e tras quai da grond interess commerzial.

RR novitads 10:00